ෆ්‍රැන්සිස් පාප් වහන්සේ ස්වර්ගස්ථ වීමෙන් පසු ඊළඟට සිදුවන්නේ කුමක් ද?

රෝමානු කතෝලික පල්ලියේ අධ්‍යාත්මික නායකයා ලෙස වසර 12ක් සේවය කළ ෆ්‍රැන්සිස් පාප් වහන්සේ වයස අවුරුදු 88දී ස්වර්ගස්ථ වූහ.

උන්වහන්සේගේ ස්වර්ගස්ථ වීමත් සමග සියවස් ගණනාවක් පැරණි චාරිත්‍ර වාරිත්‍ර ඇතුළත් ශෝක කාලයක් ආරම්භ කර තිබේ.

නව පාප් වහන්සේ තෝරා පත් කර ගැනීමේ ක්‍රියාවලිය ද ආරම්භ කර ඇති අතර ෆ්‍රැන්සිස් පාප් වහන්සේ ස්වර්ගස්ථ වීමෙන් දින 15ත් 20ත් අතර කාලයකදී නව පාප්වරයෙකු තෝරා ගැනීමේ රහසිගත හමුව පැවැත්වීම අපේක්ෂා කළ හැකි ය.

පාප් වහන්සේගේ කාර්යභාරය කුමක් ද?

කතෝලික පල්ලියේ ප්‍රධානියා වන්නේ පාප් වහන්සේ ය. රෝමානු කතෝලිකයන් විශ්වාස කරන්නේ, උන්වහන්සේ ජේසුස් ක්‍රිස්තුස් වහන්සේව ඍජුව නියෝජනය කරන බව ය.

උන්වහන්සේ ක්‍රිස්තුස් වහන්සේගේ මුල් ගෝලයන් වන අපෝස්තුළුවරුන් අතර ප්‍රධානියා වූ ශාන්ත පීතරගේ ජීවමාන අනුප්‍රාප්තිකයෙකු ලෙස සැලකේ.

උන්වහන්සේ කතෝලික පල්ලියේ සම්පූර්ණ පාලනය දරන අතර ලොව බිලියන 1.4ක කතෝලිකයන්ගේ ප්‍රධාන නායකයා වෙති.

• ෆ්‍රැන්සිස් ශුද්ධෝත්තම පාප් වහන්සේ: කතෝලික සභාව වෙනස් කළ පෘථිවියේ දකුණු අර්ධ ගෝලයෙන් බිහිවූ පළමු පාප් වහන්සේ

කතෝලිකයන් බොහෝ විට සිය මග පෙන්වීම සඳහා බයිබලය පරිශීලනය කළත්, පල්ලියේ විශ්වාසයන් සහ පිළිවෙත් පාලනය කරන පාප් වහන්සේගේ ඉගැන්වීම් වෙත ද ඔවුන්ට යොමු විය හැකිය.

ලොව පුරා සිටින සියලු ම කිතුනුවන්ගෙන් අඩක් පමණ රෝමානු කතෝලිකයන් වෙති. රෙපරමාදු භක්තිකයන් සහ ඕතඩොක්ස් කිතුණුවන් ඇතුළු අනෙකුත් නිකායන් පාප් වහන්සේගේ අධිකාරිත්වය පිළි නොගනී.

පාප් වහන්සේ ජීවත් වන්නේ ලොව කුඩා ම ස්වාධීන රාජ්‍යය වන වතිකාන නගරයේ ය. එය ඉතාලි අගනුවර වන රෝමයෙන් වට වී ඇත. පාප් වහන්සේට වැටුපක් නොලැබෙන නමුත්, උන්වහන්සේගේ සියලු ගමන් වියදම් සහ ජීවන වියදම් වතිකානය විසින් දරනු ලබයි.

පාප් වහන්සේ ස්වර්ගස්ථ වූ පසු සිදුවන්නේ කුමක් ද?

පාප් වහන්සේගේ අවමංගල්‍ය කටයුතු සාමාන්‍යයෙන් සාම්ප්‍රදායික වන නමුත් ෆ්‍රැන්සිස් පාප් වහන්සේ මෑතකදී ඒවා සරල කිරීමට එකඟ වූහ.

මීට පෙර සිටි පාප් වහන්සේලා මිහිදන් කරනු ලැබුවේ සයිප්‍රස්, ඊයම් සහ ඕක්වලින් සාදන ලද මිනී පෙට්ටියක ය. ෆ්‍රැන්සිස් පාප් වහන්සේ සින්ක්වලින් ආවරණය කරන ලද සරල ලී පෙට්ටියක් ඒ සඳහා තෝරාගෙන ඇත.

ශාන්ත පීතර බැසිලිකාවේ මහජන ප්‍රදර්ශනය සඳහා පාප් වහන්සේගේ දේහය ‘කැටෆල්ක්’ ලෙස හැඳින්වෙන උස් වේදිකාවක් මත තැබීමේ සම්ප්‍රදාය ද උන්වහන්සේ අහෝසි කර ඇත.

ඒ වෙනුවට, උන්වහන්සේගේ දේහය විවෘත මිනී පෙට්ටියක තැන්පත් කෙරෙන අතර ශෝකයට පත් බැතිමතුන්ට උන්වහන්සේට ගෞරවය පුද කිරීමට ආරාධනා කරනු ලැබ තිබේ.

සියවසකට වැඩි කාලයකට පසු වතිකානයෙන් පිටත භූමදාන කරන පළමු පාප් වහන්සේ ලෙස ෆ්‍රැන්සිස් ශුද්ධෝත්තම පියතුමන් පත් වනු ඇත.

උන්වහන්සේගේ දේහය රෝමයේ පාප්තුමාගේ ප්‍රධාන දේවස්ථානවලින් එකක් වන ශාන්ත මේරි බැසිලිකා දේවස්ථානයේ තැන්පත් කරනු ලැබේ.

බැසිලිකාවක් යනු, වතිකානය විසින් විශේෂ වැදගත්කමක් සහ වරප්‍රසාද ලබා දෙනු ලැබ ඇති පල්ලියකි. ප්‍රධාන බැසිලිකාවලට පාප් වහන්සේ සමග විශේෂ සම්බන්ධයක් ඇත.